Ministri i Ministrisë së Zhvillimit Ekonomik, Valdrin Lluka ka takuar Shoqatën e Ujërave të Kosovës.
Ai  nëpërmjet një statusi në rrjetin social facebook ka thënë se me këtë shoqatë ka diskutuar për problemet e ujit.

Statusi i plotë:

Pasi e studiova me kujdes raportin e Autoritetit Rregullator për Shërbimet e Ujit, takova Shoqatën e Ujërave të Kosovës (SHUKOS) ku bëjnë pjesë të gjithë Kryeshefat e Ujësjellësve Rajonal të vendit! Diskutuam problemet e këtij sektori vital për vendin.

Disa nga problemet janë:

1. Humbjet e ujit të përpunuar në nivel vendi: 57%. Pra ky është uji i përpunuar dhe që nuk faturohet dhe humb për 3 aryse: a. Rrjedhjet e gypave të vjetër, b. Lidhjet ilegale dhe c. humbjet nga kycjet legale por që nuk faturohen mirë për shkak të orëmatësve të vjetëruar. Shumica (mbi 50% e humbjeve) janë nga kycjet ilegale. Norma e kënaqshme është nën 20% kurse standardet Evropiane janë rreth 12%.
2. Mesatarisht në Kosovë përpunohen rreth 256 litra ujë në ditë për kokë banori. Mesatarja në vendet skandinave është 75 litra për kokë banori. Keqpërdorimi i ujit tejkalon cdo masë.
3. Momentalisht janë 318,324 konsumatorë, duke mbuluar 1.5 milionë banorë, apo 91% të popullatës me ujë të sigurtë dhe të pijshëm.
4. Ka pasur rritje të kapaciteteve përpunuese të ujit, mirëpo gjëndja e humbjeve është përkeqësuar në raport me kapacitetet e reja.
5. Trajtimi i ujërave të ndotur është inekzistent. Vetëm 2% e tyre trajtohen, kurse pjesa tjetër derdhet pa asnjë trajtim në natyrë.
6. Gjakova qëndron më së miri sa i përket kualitetit të ujit, ndërprerjeve të furnizimit dhe zvogëlimit të humbjeve.

Sektori ka nevojë urgjente për intervenim dhe investime kapitale.

Koha për me u bë ekspert i ujërave!